BB致親愛的爸爸媽媽 - 關於初生嬰兒的眼睛健康及視覺發育 II

親愛的爸媽，

上次跟你地說了一些關於我一歲之前的眼睛和視覺發育狀況。你地可能會諗， 除咗一路觀察我嘅狀況之外， 還可以做甚麼幫助我嘅視力發展得更健康呢？

唔使我講，你哋已經做到十足十嘅就係對我悉心嘅照顧，同給予我各式各樣營養豐富又適合我嘅食物， 睇到我又肥又白就知！其他可以幫助我視力發展得更好嘅事情就等我慢慢話你地知喇！

上次都講過， 我起初嘅視力麻麻地，會睇到近距離 (30-40 cm) 郁動嘅大物件, 頭幾個月我其中一個主要需要發展嘅視覺功能就是眼睛能準確同穩定追踪物件的能力，手眼協調力和距離感，所以你哋可以在我牀仔上方掛一些會搖晃嘅玩具來刺激我這些方面的發展，不過要軟綿綿同掛穩，唔好跌落嚟打傷我。

另外媽媽妳走來走去照顧我的時候可以多啲同我傾偈， 我就會依據妳嘅聲音，眼仔碌碌咁搵妳， 咁我嘅眼睛追踪力就會愈來愈敏捷。爸爸你呢，放工返嚟餵我食奶唔好次次都坐在同一位置抱我，坐下唔同位置換下手抱我，就可以俾我兩眼有不同嘅影像刺激。可以的話，久不久幫我轉變牀仔的方向，我就會無咁悶同埋會有不一樣的視覺環境， 眼仔就會繼續不斷探索。仲有晚上在我牀仔旁也可持續開著一盞暗暗的燈，一來我有點怕黑，二來這也有助我眼睛發育。

到我四至八個月大，我開始郁身郁勢， 指手畫腳， 手眼以至身體眼睛協調每天快速的發展，這段時期你哋可以多啲俾我看不同形狀，觸摸不同手感嘅物品，同埋在安全的環境下，俾我爬來爬去。唔需要太快要我行， 四腳爬爬讓我更易掌握手眼以至身體眼睛協調的技巧。 到一歲之後我學懂走路後，你哋就唔好咁黐身成要抱我，在安全的環境下讓我自由奔跑，爬高爬低，又或者同我踢踢波。這樣我的身體眼睛協調會更靈活，也會對自己更有自信啊！

肥B上

資料來源: https://www.aoa.org/

Oh! 爸媽原文轉載

作者：江志榮博士 Dr Marco
視覺科學哲學博士, 註冊視光師 (第一部分)