青光眼的症狀及注意事項！飲咖啡會導致青光眼嗎?
1) 問：何謂青光眼？
江博士：青光眼 (glaucoma) 係連住我哋眼睛到腦袋嘅嗰條傳送訊息嘅cable視神經受損變壞嘅眼病，會導致視野狹窄、視力模糊，嚴重嘅話可以失明。導致視神經變壞嘅原因有很多，其中一個風險因素係高眼壓，簡單嚟講，眼球裏面有一個組織 (ciliary epithelium)，會為眼球內部分泌注入有鞏固眼球結構作用嘅營養液 (aqueous humor)，之後營養液會經一啲渠道溜走， 如果營養液注入太快或者流走太慢，眼壓就會上升。
青光眼最主要嘅分類係開角性及閉角性，簡單嚟講即係流走營養液嗰個大渠口結構上係闊定係窄，另外仲有臨床上眼壓唔高，但係仍然有視神經受損變壞， 視野缺失症狀嘅normal tension glaucoma，同埋其他小分類。
最常見嘅係開角性青光眼 (open-angle glaucoma)，開角性青光眼引起嘅視神經變壞初期好多人都感覺唔到乜嘢症狀，但係其實個病已經損害緊你嘅視神經，令到你週邊嘅視野出現缺失、縮窄，大部分呢一類病人，都係個病去到中後期，影響到中心視力，自己覺得睇嘢模糊先去檢查，但係其實視神經都已經壞死得幾嚴重，要知道以現在嘅醫學，壞死咗嘅係神經細胞係難以翻生㗎!所以開角性青光眼被稱為視力小偷。
反而另一個大分類，閉角性青光眼 (angle-closure glaucoma)，比較多機會有突發嘅症狀，發病嘅時候，眼壓突然升高得好多，會有頭痛、作嘔、看燈影有彩虹光等等症狀。
2) 問：咁點樣可以預防青光眼？
江博士：定期全面檢查眼睛，包括眼壓、視神經狀況，防止條cable變壞咗都唔知！就係預防青光眼嘅最好方法，保養眼睛真係好緊要！
3) 問：青光眼有多普遍?
江博士：青光眼係香港首位致盲眼疾(23%)，全世界大約有八千萬人有青光眼。
4) 問：引發青光眼風險因素有哪些？
江博士：
- 40歲以上
- 家族有青光眼病史
- 高眼壓
- 深近視就開角性青光眼風險高啲， 深遠視就閉角性青光眼風險高啲
- 眼睛曾經受過傷
- 長期使用類固醇
- 中心角膜偏薄
- 糖尿病、高血壓、偏頭痛
5）問：青光眼是否可以像白內障一樣，以手術方法根治?
江博士：青光眼只能控制病情，防止惡化，治療前已經壞死嘅視神經不可逆轉。
6）問：飲咖啡會導致青光眼嗎?
江博士：有研究顯示，一般人每日飲四杯會稍為增高眼壓，而有部分本身有較強青光眼遺傳風險嘅人，每日飲三杯左右，就會增加佢哋患上青光眼嘅風險近四倍。會令眼壓升高，所以都會提高青光眼風險。
7) 問：青光眼病人飲食上有甚麼要注意? 可以做哪些運動?
江博士：有研究顯示均衡飲食，多攝取新鮮蔬果生菜的抗氧化物，亞米加3脂肪酸或者一些茶類，黑朱古力內裏的黃酮類化合物會減低青光眼風險。多做運動身體好，男女老幼做得到，對於青光眼都係咁，但係特別情況，例如pigmentary dispersion syndrome (色素擴散症候群) 除外。
NutriLion 營養獅原文轉載
作者：江志榮博士 Dr Marco
視覺科學哲學博士, 註冊視光師 (第一部分)
參考資料:
- https://www.nei.nih.gov/learn-about-eye-health/eye-conditions-and-diseases/glaucoma
- https://www.aao.org/eye-health/diseases/what-is-glaucoma#video
- http://hkos.org.hk/?section=Top&id=46
- https://www.brightfocus.org/glaucoma/article/glaucoma-facts-figures
- https://www.mountsinai.org/about/newsroom/2021/high-caffeine-consumption-may-be-associated-with-increased-risk-of-blinding-eye-disease
- https://glaucoma.org.au/i-have-glaucoma/living-with-glaucoma/lifestyle-diet-and-exercise